الأحد، 9 أبريل، 2017

ليلية ٤

فاكر المرة اللي ماكنتش عايزة ادخل فيها امتحان الانترناشيونال فاينانس و انت كلمتني بس الصبح و دخلت وجبت A
بكرة عندي QA الفاينال ؛ انا مش قادرة ادخل الامتحان ولا قادرة اذاكر و عايزة بس اموت .
احساس انك عايز اليوم دا يخلص و متحضرهوش ..انك تسافر بعد زمني تاني او تفضل في السما لحد ما يوم الاتنين يعدي و فجأة يجي التلات.
سيناريوهات عظيمة جدا للهرب جوا دماغي ؛ و كلها بس واقفة عند إحساس واحد اني زهقت.
حكيت لك اني اتريقيت في شغلي ؛ و اني رغم كل حاجة بعمل لسه حاجات كويسة و ناجحة فيها ؛لكن ؛ عارف .. انا فاهمة كويس قوي ازاي داليدا في عز نجاحها قررت انها تمشي.
الدكتور طلب مني اكتب كل مشاعري السلبية ؛ في شكل جدول ؛ مكتبتش اي حاجة غير اني حطيت الtask دا على my to do list note على الديسك توب ..و كتبته بالإيطالي عشان محدش يفهمه غيري لما يبص ولو صدفة على اللاب بتاعي .
التو دو الزرقا للحاجات المهمة و البينك لحاجات الشغل و الصفرا لحياتي الشخصية .
مفيش ولا واحدة فيهم بتنقص
كلهم بيزيدوا ... والناس بس لما بتشوفهم بيحكوا ازاي انا شاطرة و منظمة في شغلي.
انا بس وحدي اللي عارفة ان مفيش حاجة بتخلص.
و انا مش عايزة اذاكر ولا عايزة اشتغل ولا عايزة ادخل امتحان بكرة .
انا عايزة بس أمشي .

ليست هناك تعليقات: