الأربعاء، 7 سبتمبر، 2011

تهييسة قبل النوم !


(1)
نص ساعة بدور في النت
على نكتة تضحكني
ملقيتش
أنا اصلي غاوي اضحك على نفسي
مفيش غيري اراجوزي و بلياتشى

(2)
متشيلش  جرحك في الجيوب
احسن و انت بطلع جنيهك المظلوم معاك
ممكن يقع ...تذكرة مترو تسافر بيك بلاد
سبت جرحك على الازاز و خدت مكانه شعبطة
بين محطات الوصول
و مش لاقي اسمك في الكشوف
لا انت ناجح و لا انت ساقط
انت مين؟
انت اللى  واقف على الرصيف من زمان و سبت جرحك ع الازاز !


 (3)

 عبيطة جدا

بتتفرد و تتني و بتضحك بصوت عالي
مش بيهمها
و بتعمل مكشرة لما ازعق , و انا كنت كده تمام  زيها
قبل ما اكبر !

(4)
                                                        بفكر أنام

مش عارفة ليه طالع في دماغي النهاردة اني افكر
فى العادة بنام من غير حكاوي كتير مع نفسي
أصلي بزهق من رغيي اللي بيعملى صداع
ايون ...أنا الوحيدة اللى بتصدع من كلامها لنفسها
و عشان كده
انا قلت أفكر انى انام قبل ما نفسي تبتدى تاني الحوار
قلت اغيظها مرة واحدة
 و انام و اسيبها لوحدها !

هناك 4 تعليقات:

Bent Ali يقول...

هدير..

فكرتينى بصلاح جاهين وهو بيقول " فلبى بزغزغ روحه عشان يشيل منه التكشيرة"

روح .. طعم.. نكهة جاهين فى النص، وعاجبنى جداً وحساه مختلف وجديد عليك يا هدير.. للأمام دايماً يا ديرو

هدير يقول...

وحشتيني يا وفاء
و حشتينى جدا و مبسوطة قوي انها عجبتك , فيه كلام مينفعش يتقال غير بالعامي
انا فين و صلاح جاهين فين بيني و بينه مسافات ضوئية زي اللى بين الارض و القمر

shery يقول...

حاسة اني فاتني كتير اوي
تصدقي ان بوستاتك الجديدة مانزلتش على المدونة عندي!!!!
لسة قرياهم كلهم
وفعلا البوست ده فيه روح صلاح جاهين
جميل بجد ياهدير
تحياتي ياعزيزتي
واصدق التهاني بهذا الثوب الرائع

هدير يقول...

وحشتينى يا شيري

مش عارفة ليه طيب مانزلتش البوستات , بس على اي حال ابقى عدى على البلوج و اقعدي شويا و بعدين امشي مش لازم تستنى لما تظهر حاجة عندك؟؟؟؟
مبسوطة انها عجبتك رغم ان انا فعلا مش من انصار العامية
تحياتى بقى و ف انتظار جديدك يا شيري